د طالبانو له خوا د واک د تر لاسه کولو په درشل کې د روسیې د ملي امنیت سلاکار نیکولای پاتروشیف په نوي ډیلي کې له خپل هندي سیال اجیت دووال سره لیدلي دي. په دې غونډه کې د بهرنیو چارو وزارت، دفاع وزارت او امنیتي ادارو استازو هم ګډون کړی و.
دې غونډې ته د اګست په ۲۴ مه د لومړي وزیر مودي او د روسیې د ولسمشر ولادیمیر پوتین ترمنځ د ټیلیفوني خبرو په پایله کې کتل کیږي.
طالبانو تېره شپه د موقت حکومت د جوړېدو اعلان وکړ. د کابینې جوړښت په ډیرو هیوادونو کې اندیښنې راپارولي دي.
د طالبانو ویاند ذبیح الله مجاهد د کابینې د غړو نوملړ اعلان کړ. په دې کابینه کې هیڅ ښځه یا د اقلیتي ټولنې غړي ځای نه لري.
ملا حسن اخند د افغانستان نوی سرپرست صدراعظم او ملا عبدالغني برادر د افغانستان د امارت د صدراعظم مرستیال دی.
سراج الدین حقاني د طالبانو په کابینه کې د کورنیو چارو او استخباراتو د وزارت مسوول دی. ملا یعقوب د دفاع وزیر دی.
د يادونې وړ ده، چې د کورنيو چارو وزير سراج الدين حقاني د نړيوال تروريست په نوم پېژندل شوى دى.
***